الموضوع ده موجه لكل بنت انسه كبيره ناضجه,,,, او مش لازم كل دول
طلعت من حظها الهايل الجميل بنت
وده لما بتكون على وش جواز
بتعملى ايه لما بييجيلك عريس ؟؟؟؟؟؟؟؟؟؟؟؟؟؟
ايوا
الفارس المغوار وفتى الاحلام اللى هيجى ينتشلك من الضياع والوحده والبؤس ياعينى
لما مامتك تفعد تتكلم فى التليفون مع واحده بصوت واطى متقدريش تسمعيه بس تقدرى تستشفى هى بتقول ايه
وبعد ماتقفل ينزل عليكى الخبر الصاعقه
انتى جايلك عريس
وبما ان انتى جايلك عريس
فالعريس ده لازم ييجى يتفرج عليكى قصدى يشوفك ويفحصك من فوق لتحت
والعريس طبعا هييجى يشوفك فى 3 اماكن
يا اما الشغل
يااما البيت
ياما لو كان معاه قرشين ممكن يعزمك انتى واهلك على كباية مايه ساقعه
وبما ان طبعا 99% من رجالة مصر رجاله بجد
اصحاب قرارات بجد
يعتمد عليهم بجد
واهم من ده كله لهم شخصيه جامده قووووووووى
اكيد مش هييجى لوحده علشان يعاين,,,, يووووه قصدى يشوف العروسه
فهو هيجيب معاه ياما واحده من 4
مامته
اخته
خالته
عمته
وحد من الجيران ميضرش
وممكن لو شخصيته اقوى واقوى
يجيبهم كلهم معاه
مع العلم انه هو لسه داخل يتفرج قصدى يشوف
والله اعلم
طبعا لازم تلبسى اللى ع الحبل شئتى ام ابيتى ولا تبقى بنت عاقه معندكيش دم
وييجى بقى عريس الغفله
ويتفرج يشوف يعنى اكيد انتم فهمتم معناه
ويمشى
ده بقى العريس
توابعه بقى
يااما حاجه من اتنين
ياما انتى متدخلتيش دماغه فلا يعبر ولا يتصل من اساسه
ساعتها بقى يتقلب البيت محزنه
والدتك : يارب اعمل ايه هتفضلى قاعده لغاية امتى هو ايه اللى مش عجبه فيكى
قلتلك 100 مره اعملى رجيم اكيد مشى علشان انتى طخينه ولا رفيعه مش هتفرق
ماهو دلوقتى العرسان عايزين يتجوزوا ميرفت امين ولا سعاد حسنى
ياما كده يااما خلاص
ده على اساس ان هو رشدى اباظه ولا حسين فهمى
انتى بقى تحطى ايدك على خدك هو مشى ليه اكيد انا وحشه؟؟ طخينه؟؟ دمى تقيل؟؟
ولو انتى بنت رهيفه حبتين يقلب معاكى دور اكتئاب وفقدان ثقه
نيجى بقى للحاله التانيه
لو هو بقى مدخلش دماغك ومرتحتيلوش
والدتك:
ازاى يعنى ايه ده عريس لقطه اى بنت تتمناه ده عنده شقه مطرحين وصاله وعفشة مايه
انتى فاكره نفسك مين سعاد حسنى ولا ميرفت امين ده يلاقى ست ستك
عايزين نخلص منك بقى
هتفضلى قاعده فى ارابيزنا لحد امتى
وبرده الموضوع هيقلب بغم وهم ونكد
خصوصا لو الواد طلع لازقه بقى ومش راضى يسيبك
فى النهايه احب اسال كل بنت بتعملى ايه بقى ؟؟؟؟؟؟؟؟؟؟؟؟؟؟؟؟؟؟
هل بتعندي وترفضى تقابلى حد من الاساس علشان يتفرج عليكى هو والعيله
وتدبى خناقه مع مامتك تبيتها زعلانه وتبيتك قرفانه
ومفيش حد يقدر يزحزحك عن رايك ؟؟؟؟
ولا بتعملي اييييييه؟
مستنيه مشاركتكم يا بناتيت
ومفيش مانع الرجاله يقولوا رأيهم
في انتظاركم